Breaking News

வெடுக்குநாரி ஆதி சிவன் ஆலய நிர்வாகத்தின் மீது புதிய பிரிவில் வழக்கு: பிணையில் விடுவிக்கப்பட்டனர்!


வெடுக்குநாரி மலை ஆலய நிர்வாகத்தினருக்கு எதிராக புதிய பிரிவின் கீழ் வவுனியா நீதிமன்றில் தாக்கல் செய்யப்பட்ட வழக்கில் நிர்வாகத்தினர் பிணையில் விடுவிக்கப்பட்டனர்.

நெடுங்கேணி வெடுக்குநாரி மலை மற்றும் அதனை அண்டிய பகுதிகள் தொல்பொருள் திணைக்களத்திற்கு சொந்தமானது என தெரிவித்து ஆலயத்தில் பொதுமக்கள் வழிபடுவதற்கு தடை ஏற்படுத்தப்பட்டது. இந்நிலையில் பொதுமக்களின் முயற்சியால் வழிபடுவதற்கு விதிக்கப்பட்ட தடை நீக்கபட்டதுடன் ஆலயவளாகத்தில் கட்டுமானங்களை ஏற்படுத்துவதற்கு தொல்பொருள் திணைக்களம் மற்றும் நெடுங்கேணி பொலிசாரால் தடைவிதிக்கப்பட்டது.

இந்நிலையில் வெடுக்குநாரி மலையில் பக்தர்கள் ஏறுவதற்கு வசதியாக இரும்பினால் அமைக்கபட்ட ஏணிப்படி ஒன்று அப்பகுதி மக்களால் அண்மையில் பொருத்தப்பட்டது. குறித்த ஏணிப்படி பொருத்தியமைக்கு எதிராக தொல்பொருள் திணைக்களத்தால் ஆலய நிர்வாகத்திற்கு எதிராக நெடுங்கேணி பொலிஸ் நிலையத்தில் கடந்த வருடம் ஒக்டோபர் மாதம் முறைப்பாடு ஒன்று பதிவு செய்யப்பட்டிருந்தது.

குறித்த முறைப்பாட்டின் அடிப்படையில் ஆலய நிர்வாகத்தினரை நெடுங்கேணி பொலிஸ் நிலையத்திற்கு வருமாறு பொலிஸாரால் அழைப்பு விடுக்கப்பட்டு விசாரணைகள் இடம்பெற்றிருந்ததுடன், குறித்த விடயம் தொடர்பாக தொல் பொருட்திணைக்களத்தால் வவுனியா நீதிமன்றில் வழக்கும் தாக்கல் செய்யப்பட்டிருந்தது.

வழக்கு வவுனியா நீதவான் நீதிமன்றில் கடந்த வருடம் நவம்பர்மாதம் 29 ஆம் திகதி எடுத்துக்கொள்ளப்பட்டது. இதன்போது ஆலயத்தின் சார்பில் தலைவர் சசிகுமார், செயலாளர் தமிழ்செல்வன், பூசகர் மதிமுகராசா ஆகியோர் முன்னிலையாகியிருந்தனர்.

இதன்போது நீதிமன்றில் ஆஜராகியிருந்த பொலிசார் படிகள் பொருத்தப்பட்ட விடயத்தில் ஆலய நிர்வாகத்தினரை கைதுசெய்ய வேண்டும் என தெரிவித்திருந்தனர். எனினும் ஆலயம் தொல்பொருட் திணைக்களத்திற்கு சொந்தமானது என வர்தமானியில் பிரசுரிக்கப்படாமையினால் கைதுசெய்யமுடியாது என நீதிபதி தெரிவித்ததுடன், மூவரையும் தலா 50ஆயிரம் ரூபாய் பெறுமதியான சொந்தப்பிணையில் விடுவித்திருந்தார்.

இந்த வழக்கு இன்றைய திகதிக்கு(22-5-2020)ஒத்திவைக்கப்பட்டிருந்தது.

இந்நிலையில் வவுனியா நீதிமன்றில் ஆலய நிர்வாகத்தினர் இன்று முன்னிலையாகியிருந்தனர். எனினும் முன்னர் வழங்கப்பட்டிருந்த வழக்கு இலக்கம் அழைக்கப்பட்டிருக்கவில்லை. புதிய பிரிவின் கீழ் வழக்கு அழைக்கப்பட்டருந்தது. அதன்படி முன்னிலையாகிய மூவரையும் தலா 50 ஆயிரம் பெறுமதியான சரீரப்பிணையில் நீதவான் விடுவித்திருந்ததுடன் எதிர்வரும் 9 ஆம் மாதம் பத்தாம் திகதிக்கு வழக்கு திகதியிடப்பட்டிருந்தது.

தாம் முன்னைய வழக்கின் தவணைக்கே முன்னிலையாகிய நிலையில் புதிய பிரிவில் வழக்கு தாக்கல் செய்யபட்டுள்ளமை தொடர்பாக தாம் அறிந்திருக்கவில்லை என்று ஆலய நிர்வாகத்தினர் இதன்போது தெரிவித்திருந்தனர்.

கிழே LIKE உள்ள பட்டனை அமத்தி மற‌க்கமல் LIKE பன்னுங்கள்!